ARKHABİ HAŞOREN

                                               Handğa noğaşe gepti

                                               Hac’i Ç’armatiz bore

                                               Mupeyi bozope bciri

                                               Zati ğnosiz var bore.

                                               Kelepti Kavağişe

                                               Gobic’k’edi si vare

                                               Handğa boyne si gorum

                                               Acaba haç’i sore.

                                               Mağ fala memtk’oçi do

                                               Yak’ovit’iz mod gulu

                                               Si elegakiduyi

                                               Delisteyi so ulu.

                                               Gidreva’şi ç’alendo

                                               Bağta’şe gza elaç’k’en

                                               Hek ar bozo kobc’iri

                                               Ek’ik’ten do ma moç’ken.

                                               Gidreva K’ayi Kyoyi

                                               Gverdi jile oktiren

                                               Ma hek ç’nğomi ep’çopi

                                               Dido ti ucuzi ren.

                                               Cgiyazenişi k’oçi

                                               Dido P’at’i şinoman

                                               Mah ek çayi ep’ç’opumt’i

                                               İyikti miçinoman.

                                               Kfamçiyoşe kelapti

                                               Haç’i gyayi p’çk’omate

                                               Gyayi k’apineyi p’komat

                                               Dolumcu na mu p’ate.

                                               Okureş emtumaniz

                                               Ma muç’o eşaptare

                                               Açkfa gemiş ğ’incişe

                                               Boyne gemti geptare.

                                               Gemiş ğ’inçiş jindole

                                               Karp’ana uç’umenan

                                               Ma muntğ’aniren miç’van

                                               Şark’ici miç’umenan.

                                               Ç’k’ameleşe kelapti

                                               Vit oğ’oyi eladgin

                                               Ma şuriz mo memoğe

                                               Si ar muntğ’a mogidgin.

                                               Çifte köprişe kelapti

                                               Ma ğ’inciş meyebulu

                                               Ma dido domaç’k’indu

                                               Açkfa noğaş varbulu.

                                               Suhuletişe keşapti

                                               Ma ckfa derdi var miğun

                                               Destaniş oç’auşe

                                               Ma dido ğnosi miğun.

                                               Köy içkimiz melendo

                                               Ar yaniz P’aP’ilat’i ar yaniz orta köyi

                                               Oktiz var eşemalen

                                               Zoyi momiğtam zoyi.

                                               Baş köyişi mahallez

                                               Ç’kamele uç’umenan

                                               Ma ç’fa irik miçinomz

                                               Şarkici miç’umenan.

                                               Nobeğlen okti köyi

                                               Şkurnaten var goyilen

                                               Si he gza momet’k’ome

                                               Potocurişe ilen.

                                               Potocurişe kelapti

                                               Ma çkfa hek omant’alu

                                               Dido k’arişuği ren

                                               Gzapeti memant’alu.

                                               Pareh’i uç’umenan

                                               Yaylasteri köyi ren

                                               Ama yaşlepeşeni

                                               Eşah’timu zoyiren.

                                               Ma yaylaşe mebulu

                                               Ar tutaşi geptare

                                               Arkadaşi vam yonun

                                               İri ğfala goptare.

                                               Bulu do var içoden

                                               Aci göleşi emti

                                               Ma dido domaç’k’indu

                                               Mudez moh’tase gemti.

                                               Aci gölez hekole

                                               İri gvarda bidare

                                               Dumani kododuna

                                               Mağ fala so bidare.

                                               Tikme’z ç’ale çamluği

                                               P’anda dumani koren

                                               Biç’k’e mutu var bcirom

                                               Ha bagenepe soren.

                                               Ğaliz ko mebadgiti

                                               Kfaç’aç’şe mebulu

                                               Ma dido domaç’k’indu

                                               Açkfa zati var bulu.

                                               Ma kfaç’aç’şe kepti

                                               H’oloti koren emti

                                               Ee ğormoti mu iven

                                               Ar p’a komoh’taz gemti.

                                               Kfaç’aç’işi hekole

                                               Agara moh’taseyi

                                               Handğa boyne şa ğ’onsun

                                               Yildurum geh’taseyi.

                                               Agara didi yayla

                                               Eş emsali var uğun

                                               Meydaniz miti varen

                                               İriz bageni kuğun.

                                               Agaraz kelebaç’k’i

                                               H’olo emti komoğtu

                                               Ma dunyaz ko gamapti

                                               Orta yayla var moğtu.

                                               Göleşi emtumani

                                               Mutute var içoden

                                               Burguli goç’omağu

                                               Ma dermani maçoden.

                                               Ma çfa doboçodini

                                               Göleşi emtumani

                                               Haç’i gvarda bidare

                                               Arada gemtimani.

                                               Orta yaylaş komopti

                                               K’at’a yayla kobciri

                                               K’at’u meyalaperi

                                               Ar mutute vab ciri.

                                               Noğadid k’ayi yayla

                                               Okti var uğun okti

                                               Ar H’orç’i opçk’omati

                                               Şişi yokti do gyokti.

                                               Noğadidiz tudele

                                               Sefaili eç’uh’en

                                               Dido pisi yayla ren

                                               Boyne duman heg noh’en.

                                               Jur alacagoli ren

                                               Ar tudeni, ar jini

                                               Mjora geyilaşkule

                                               Dido ini ren ini.

                                               Rak’aniz goloborom

                                               Kepti Sirt’i yaylaşe

                                               En soni mek’aptare

                                               Açkfa Kara göleşe.

                                               K’ara göle kobc’iri

                                               Ama nak’o derini

                                                Mjora mok’ağaşkule

                                               Seyini ren serini.

                                               Kara göleşi ortaz

                                               Mskfa çiçekli ada ren

                                               Omçviruti var miçkin

                                               Ma heg muç’o bidaren.

                                               K’ara gölez melendo

                                               Meteizişi daği

                                               P’urmoli var gololun

                                               Ko gebudgamt’i aği.

                                               Dido ti yukseği ren

                                               Meteizişi daği

                                               Şuri ko gamamiğtu

                                               Ko gemalat’u saği.

                                               En son ima komopti

                                               Çkimi Met’u yaylaşe

                                               Heya çkfa dobibadi

                                               Çkfa var eşemalase.

                                               Ma dido gomanç’elu

                                               Çatal kayaz gvardani

                                               Ar ğ’olo kob c’irat’i

                                               Ç’veyiş duziş rak’ani.

                                               Çveyi duzişi ğaliz

                                               Oğ’iyaloni uğun

                                               Ar kfa dolot’k’oçaşi

                                               Dunya mostun do gyulun.

                                               He Elifişi k’ayaz

                                               Mupeyi sesi uğun

                                               Muntğa uç’varen zop’onz

                                               K’oçişi ğnosi uğun.

                                               He Elifişi kayaz

                                               Boç’k’e K’oçi var gulun

                                               Ma munth’ani buç’varen

                                               Ayni sesi gamulun.

                                               Enni K’ayi atmaca

                                               Çkuni Met’uz golulun

                                               K’anati ugeçamu

                                               İtken do muço ulun.

                                               Boğaziz keşiç’k’edu

                                               Atmacaşi şahini

                                               Ağiz emi puth’aşi

                                               Ma ebuç’k’i bgayini.

                                               Atmacape bciraşi

                                               Ma ğnosiz gamabulu

                                               İspiri var pçopina

                                                Köyişe var gebulu.

                                               Şiiriz oç’arute

                                               Toliz ti mağağilu

                                               Heya çkfa dogibağun

                                               H’ez takati memilu.

                                               Met’uşen ko mek’apti

                                               Balli dereşe k’ele

                                               Ma Mteli omant’alu

                                               Gzati varen çk’ak’ele.

                                               Balli derez hekole

                                               Gelulun didi ğali

                                               Ar gza megant’alu na

                                               İkti do iburbali.

                                               Didi ğaliz hekole

                                               Ç’ut’a gvarda idare

                                               Ma heg gzas ebat’ina

                                               Olimğanez bidare.

                                               Olimğaneşi gemti

                                               Mteli k’aç’k’nak’a ren

                                               Topuyiş şura gulun

                                               Ha k’arvanepe soren.

                                               Olimh’anez hekole

                                               Dido siği çami çanz

                                               Ç’ut’ati maşkurinen

                                               Boyne k’albik gemiçams.

                                               But’k’uciz mebatğozi

                                               K’arvanepe kobciri

                                               Ar çfa gobiç’k’edişi

                                               Ma tolite mub bc’iri.

                                               Ar didi çami gedgin

                                               Hiçi t’ot’i var uğun

                                               Çamiz bagen geşadgin

                                               Temelit’i var uğun.

                                               Olimh’aneşi topuyiz

                                               Eş emsali var uğun

                                               Ha topuyişi yaniz

                                               Anzer baliz mu uğun.

                                               But’k’uci ulun mulun

                                               Boyne topuyi moyimez

                                               Kavrani oyipşayiz

                                               Na moskidu so imez.

                                               Ha topuyi oçk’omi na

                                               Si doğtoyi var ginon

                                               Şuyiz ko memoğedi

                                               Si çkfa dayaği ginon.

                                               But’k’uci ulun mulun

                                               Boyne ikomsi çeçi

                                               Ha topuyiş rek’lami

                                               İnternetiz ko meçi.

                                               Ha topuyişi sayibiz

                                               Acep coğo mu coğonz

                                               Coğo ti ma dogiç’va

                                               Hemuz ti Hamdi coğonz.

                                               Met’uşen ko gamapti

                                               Hiçi gza var ic’iren

                                               Dumani ko dataç’u

                                               Toliz ti var maciren.

                                               Ko gepti kfamurgişe

                                               Gvardaniz golobulu

                                               Ma dido domaç’k’indu

                                               Ar çkfa soti var bulu.

                                               Bulu do var içoden

                                               Ha yaylayi gzalepe

                                               Ma çkfa domi h’alalit

                                               Ee da do cumalepe.

                                               Ma çkfa köyiş mebulu

                                               Hiçi derdi var miğun

                                               Ğnosi mod domoguram

                                               Ma ğnosi çkim ko miğun.

                                               Ma köyişe ko gepti

                                               Ar ko gamabiuri

                                               K’arşiluği ko momçi

                                               Ar siti ko gamiuri.

                                               Ma balk’oniz gelapğe

                                               Çay içkimi gebogzam

                                               Nçolo komebok’idi

                                               Boyne ç’uk’iz mebugzam.

                                               Heya çkfa dogibağun

                                               Na giç’ayi destani

                                               Gorana var gac’iren

                                               Si hamuşi emsali.

                                               Hana pç’ayi destani

                                               Si muço ikitğare

                                               H’olo miç’ayi diye

                                               Dido gomik’itğare.

                                               Na giç’ayi destani

                                               Moğti do ar dik’ikği

                                               Ma mod gomiç’k’endinam

                                               Arada gomikitği.

                                               Ma hemdiş bere bore

                                               Suhuletiz meşapğe

                                               Buyuklepeşi bere

                                               Selahattini bore.

                                               Selahattin ÖZBIYIK  Ağustos 2009 ARHAVİ Küçükköy.