ARKHABİŞİ YAYLAPE

                                                Oh’oyiz ko gamapti,

                                               H’olo yaylaşe mebulu.

                                               Heya ç’kfa kogebagi,

                                               Boyne H’fala gobulu.

                                               Çifte Köprü’şe ko gepti,

                                               P’ap’lat’işe bidare,

                                               Ar gza memant’alu na,

                                               Ma h’fala so bidare.

                                               Bikti, doboçodini,

                                               P’ap’latoyi viraji,

                                               Gza  k’ala geladgit’u,

                                               Şekeroğliş garaji.

                                               Keşapti P’ap’lat’işe,

                                               Eşi, dosti kobciri.

                                               Ar çkfa gobiç’k’edişi,

                                               Ma tolite mu bciri.

                                               Ar k’ayi nayla gedgin,

                                               Kfaşi direği uğun.

                                               Hetepe na vu ustaz,

                                               Muperi guri uğun.

                                               Ar k’ayi came gedgin,

                                               Minare mk’ule uğun.

                                               Duvari dido mskfa ren,

                                               Eş. Emsali var uğun.

                                               İsinaliz oh’oyi,

                                               İri h’olo yazluği.

                                               Mteli didağu doren,

                                               Soti varen duzluği.

                                               Kfa P’ap’ulişe kepti,

                                               Sazluğişe mebulu.

                                               Atmaca var pç’op’i na,

                                               Ma zati var gebulu.

                                               K’at’a mşkeyişi kökiz,

                                               Atmacaci kelah’en.

                                               Aydinoğli Ahmet’i,

                                               Ağa steri gelah’en.

                                               He sazluğiz rak’aniz,

                                               Dido iven atmaca.

                                               Yeyi icubalaman,

                                               Boyne köşe k’apmaca.

                                               Sazluğiz golobili,

                                               Ma t’aşluği kobciri.

                                               Ar geduzaşen başka,

                                               Hiçi mutu var bciri.

                                               Bagenepez tudele,

                                               Arabaşi gza golulun,

                                               He gzas konath’ozina,

                                               Batakluğişe ulu.

                                               Batakluği çöl iren,

                                               Şkurnaten var golilen.

                                               Arçoliz geyili na,

                                               Zati var eşegalen.

                                               Koca k’ari zop’onan,

                                               Baddo kçini elah’en.

                                               Bagenişi oğine,

                                               Ağa steri gelah’en.

                                               Koca k’ariz hekole,

                                               Mağara yok’uşi mulun.

                                               He mağaraz doloh’e,

                                               Dido altun gamulun.

                                               Güloğli’ya zop’onan,

                                               Acep he Güli soren.

                                               Ma c’kayi maominu,

                                               Oşoni c’k’ayi soren.

                                               Nop’ap’enişe kelapti,

                                               Ar bageni geladgin.

                                               Ma şuriz mo memoh’e,

                                               Si ar munth’a mogidgin.

                                               He K’itmirişi yaylaz,

                                               İni c’k’ayi gamulun.

                                               İlica ya zop’onan,

                                               Acaba solen mulun.

                                               He K’itmirişi c’k’ayi,

                                               Zabunepeşi ilaci.

                                               Para var giğunani,

                                               Ar p’a dovit, pilavi.

                                               K’aya dibi’şe mebulu,

                                               Ali Can’i Ali’şe,

                                               Hek ancah’i eşilen,

                                               H’avic’iş oc’komuşe.

                                               Kayadibi’şi ğaliz,

                                               Kara keçi golah’en.

                                               He Ali Can’i Ali,

                                               Ağasteri gelah’en.

                                               Ar avi domi ili,

                                               Ar h’orc’i opck’omati,

                                               Avi mi ilu diye,

                                               P’anda gogişinati.

                                               Arpaçayi zop’onan,

                                               Hek arpa h’açkumani.

                                               Mutute var içoden,

                                               Etrafi gomtumani.

                                               Çağil’i uc’umenan,

                                               Hek çağili nobğuni.

                                               Ar çuçut’a geduzas,

                                               Bagenepe gobğuni.

                                               Yurdi na uc’umenan,

                                               Dido okti ren okti.

                                               Yatuk doneri vi do,

                                               Ar yokti do ar gyokti.

                                               Çamluği na zop’onan,

                                               Mteli çamluği reni,

                                               Boyne oktiz gobulu,

                                               Soti duzi vareni.

                                               Kepti sirt’i yaylaşe,

                                               Çukurişe mebulu.

                                               Do nak’onayi yayla,

                                               Ma ğnosiz gamabulu.

                                               Çukurişi gvardani,

                                               Bulu do var içoden.

                                               Heya koh’oboc’oni,

                                               Ma dermani maçoden.

                                               Çukuriz golobili,

                                               C’ilik’vani ko moh’tu.

                                               Hek’o h’fala ko gopti,

                                               Ar mititi var moh’tu.

                                               Tolişi osoni c’k’ayi,

                                               C’ilik’vaniz gamulun.

                                               Hek’o rek’lami bikom,

                                               Ar mititi var mulun.

                                               Enni yukseği dağiz,

                                               Marsis’i uc’umenan.

                                               K’at’a yaylaz gobili,

                                               Şarkici mic’umenan.

                                               Heya dido zoyi ren,

                                               Lazurişi oç’aru,

                                               Ar si ko giç’k’it’u ko,

                                               Ma mupe memaç’aru.

                                               Heya ckfa domilumcu,

                                               Ma kodopskidi geçi,

                                               Ha şiiriş rek’lami,

                                               İnternetiz ko meçi.

                                               Kemal’i k’ayni çkimi,

                                               Ma haya si giçari.

                                               K’ayi ok’ith’uşeni,

                                               Daktilote doç’ari.

                                               Yaylapez mtiri domtu,

                                               Ma köyişe gebulu.

                                               Heya çkfa do gibağun,

                                               Ar çkfa soti var bulu.

                                               Ha şiiriş oc’aruş,

                                               Ma çkfa oh’obuşkfaren.

                                               Heya koh’oboc’oni,

                                               Ğnosiz goşobubğare.