REMZİ DEDE

                                                Remzi dede h’omula

                                                Heya guyiz mebiç’va

                                               Makfali k’ayi uç’onz

                                               Momçi do ar dobuç’va.

                                               Remzi dede moyinç’u

                                               Heya Mp’oli’şe nulun

                                               Dido gomanç’elase

                                               Ar çfayi mudez mulun.

                                               Ha gonç’eyi t’aroniz

                                               Memt’k’ome do nuluyi

                                               Vaşa çku gemigondit

                                               Ar çkfayi var mulu yi?

                                               İdi do ordo moğti

                                               Na şuri mişinare

                                               Si ma vamp’orom ama

                                               Dido gomişinare.

                                               Hanç’o na ç’ili ntğiri

                                               Si Mp’oli’şe mediği

                                               Ar çkfayi moyit’ayiz

                                               Ma hediye momiği.

                                               Na giç’ayi destaniz

                                               Si uci mot elaçam

                                               Ma haya si giç’ari

                                               Başka mitiz mod meçam.

                                               Dumani ko geladu

                                               Haç’i mç’ima mç’imase

                                               Sude k’ayi bozo ren

                                               Enna dede guğtase.

                                               Remzi dede ha onaz

                                               Ulun, ko meşağedun

                                               Çalişkani k’oçi ren

                                               Rağat’i var doğ’edun.

                                               Ar bida gobilaren

                                               Acaba heg mupe vu.

                                               Muvu illa kom içkin

                                               Dunya meydani dovu.

                                               Bineğisuzi ncape

                                               Ar teği var dut’alu

                                               M ana buç’vi şeepe

                                               Başkapez k’ek’ut’alu.

                                               P’anda avliz golulun

                                               Sirt çanta mok’ideri

                                               Dido guyiz memaç’ven

                                               P’anda ti gek’ideyi.

                                               Onaşen geyit’ayiz

                                               P’anda dişka komobun

                                               Ha mak’bule damuşi

                                               K’oçiz bela dolobun.

                                               Dişka geyimat’eyiz

                                               Tanih’a gzaşen gyulun

                                               P’anda oçalişuten

                                               K’oçi ğnosiz gamulun.

                                               Çalişkani k’oçiren

                                               Eş emsali var uğun

                                               Uşkuri miç’ilaman

                                               Emeği dido uğun.

                                               Meşağen nç’ulu k’fatumz

                                               K’aepe ko goşimez

                                               Na var ipelen nç’ulu

                                               Ezdimz ma ko momimez.

                                               H’olo mutu var bzop’on

                                               Dayi çkimiz bere ren

                                               Ma dido gomanç’elu

                                               Handğa acaba soren.

                                               K’at’a fara ko mulun

                                               “Burçuli milasiri”

                                               Mati p’anda buç’ume

                                               İdi do si lasiri.

                                               Ha halaşi skaniz bere

                                               Destani mot aç’aren

                                               Sevdaluği dido vu

                                               K’oçiz iri naçaren.

                                               Si daçkimişi bere

                                               Mutu bore giçkini

                                               Na golilu ndğalepe

                                               Çkfa mutu ko giçkini.

                                               Boyne germaz meşağe

                                               Si mudez gamağtare

                                               Mati duyla ko miğun

                                               Çkimde mundez moğtare?

                                               Sap’i modoni oraz

                                               Boyne çkimde kom ulu

                                               Ma ar mutu giç’vaşi

                                               İmt’e ç’ap’razi nulu.

                                               Ma çkfa mutu var bzop’on

                                               Guri çuçku gemic’in

                                               Dayi çkimişiz berez

                                               K’ap’ula kom emicin.

                                               Na giçari destani

                                               Si haya mod gondinom

                                               H’ala skanişi bere

                                               Hiçi mod gogoyindinam.

                                                           Selahattin Özbıyık ARHAVİ